នៅថ្ងៃទី១៥ ខែមករា ឆ្នាំ២០២៥ ក្រុមការងារនៃមន្ទីរកសិកម្ម រុក្ខាប្រមាញ់ និងនេសាទ ដឹកនាំដោយលោក អុិន សុវណ្ណមុន្នី អនុប្រធានមន្ទីរកសិកម្ម រុក្ខាប្រមាញ់ និងនេសាទ និងសហការីបានអមដំណើរឯកឧត្តម ចាន់ សុវុឌ្ឍ រដ្ឋលេខាធិការ នៃក្រសួងកសិកម្ម រុក្ខាប្រមាញ់និងនេសាទ មានការចូលរួមពីអភិបាលស្រុកសង្កែ អភិបាលរងស្រុករុក្ខគីរី ប្រធានការិយាល័យកសិកម្ម ធនធានធម្មជាតិ និងបរិស្ថានមន្រ្តីកសិកម្មឃុំ មេឃុំ និងលោក លោកស្រីមេភូមិ បានចុះពិនិត្យ និងត្រៀមលក្ខណៈទប់ស្កាត់ការធ្លាក់ចុះតម្លៃស្រូវ និងពិនិត្យមើលស្ថានភាពស្រូវ ដែលត្រូវប្រមូលផលនៅចុងខែមករា និងដើមខែកុម្ភៈ ។ គណៈប្រតិភូបានជួបប្រជុំជាមួយអាជ្ញាធរ ឃុំរាំងកេសី នៃស្រុកសង្កែ ឃុំធិបតីនៃស្រុកគាស់ក្រឡ ឃុំព្រៃស្វាយ នៃស្រុកមោងឫស្សី និងឃុំព្រែកជី នៃស្រុករុក្ខគីរី ខេត្តបាត់ដំបង ។

តាមការជួបប្រជុំជាមួយអាជ្ញាធររួចមកឃើញថា៖

១) ឃុំរាំងកេសី នៃស្រុកសង្កែ មានផ្ទៃដីដាំដុះសរុបមានចំនួន ១៤ ៥០០ហិកតា ដែលផ្ទៃដីស្រូវស្រង៉ែចំនួន៧៥០០ហិកតា និង អូអឹមចំនួន ៧ ៥០០ហិកតា ដែលរំពឹងថាប្រមូលផលនៅចុងខែមករា នឹងដើមខែកុម្ភៈ ។ នៅក្នុងឃុំរាំងកេសី មានផ្ទៃដីផលិតស្រូវចំប៉ីស៧០ ចំនួន៣០ហិកតា ដែល១២ហិកតា រំពឹងថាប្រមូលផលនៅចុងខែមករា ។ កសិករប្រមាណ ៤០% មានការជួលដីស្រែធ្វើការដាំដុះស្រូវ ដែលមានតម្លៃ ១២០០០០០ រៀលក្នុងមួយឆ្នាំ ។

២) ឃុំធិបតី នៃស្រុកគាស់ក្រឡ មានផ្ទៃដីដាំដុះសរុបមានចំនួន ៧៩៧៣ហិកតា ដែលដាំដុះពូជស្រូវស្រង៉ែ ៨៥% និង អូអឹមចំនួន ១៥% ហើយបានប្រមូលផលរួចប្រហែល១០% និងរំពឹងថាប្រមូលផលបញ្ចប់នៅចុងខែកុម្ភៈ។ កសិករបានកំពុងត្រូវការទឹកស្រោចស្រពលើផ្ទៃដីស្រូវប្រហែល ១០១៦គ្រួសារ  ស្មើ១០១៦ហិកតា ដែលស្ថិតនៅអាយុបីដំណាក់កាលដូចជា សំណាប បែកគុម្ព និងកំណកំណើតកួរ និងធ្វើសុំអន្តរាគមន៍ពីមន្ទីរធនធានទឹក តែទឹកមានសម្រាប់តែប្រើប្រាស់ ហើយមិនអាចផ្គត់ផ្គង់ដំណាំស្រូវបាន ។

៣) ឃុំព្រៃស្វាយ នៃស្រុកមោងឫស្សី មានផ្ទៃដីដាំដុះ ១២ ០៥០ហិកតា ដែលមានស្រូវដំាដុះពូជស្រូវស្រាល ៤៥៦៥ហិកតា ពូជស្រូវកណ្តាល ២៥០៥ហិកតា និងស្រូវធ្ងន់ចំនួន ៤៥៦០ហិកតា ។

៤) ឃុំព្រែកជីក នៃស្រុករុក្ខគីរី ដែលមានផ្ទៃដីដាំដុះស្រូវស្រាល ២៧៤៨ហិកតា ស្រូវកណ្តាល ៤៥៤៩ហិកតា និងស្រូវធ្ងន់ ៤៨៧ហិកតា ។ ស្រូវដែលនៅមិនទាន់ច្រូតប្រមាណ ៤០% ដែលជាស្រូវអូអឹម ។

លោកអភិបាលស្រុកសង្កែ និងរដ្ឋបាលឃុំរាំងកេសី និងមន្រ្តីកសិកម្មឃុំណែនាំដល់កសិករដូចជា ១) រៀបចំផែនការប្រមូលផល និងផ្សព្វផ្សាយដល់កសិករដើម្បីបញ្ចៀសការប្រមូលផលក្នុងពេលចូលឆ្នាំចិន/វៀតណាម។ ២)កសិករ អាចពន្យាពេលស្រូវក្នុងស្រែក្នុងករណីដែលអាចរក្សាបាន និង ៣) និងអាចធ្វើការលក់ដូរក្នុងករណីដែលមានការព្រមព្រៀងរវាងកសិករ និងឈ្មួញ ។

ឯកឧត្តមប្រតិភូបានពន្យល់កសិករអំពីទីផ្សារស្រូវអូអឹម ដែលជាពូជបរទេស ហើយលើកទឹកចិត្តឲ្យកសិករងាកមកប្រើប្រាស់ពូជក្នុងស្រូវក្នុងស្រុកដូចជាសែនក្រអូប ចំប៉ីស៧០ និងផ្ការំដួល ជំនួសវិញដែលក្រសួងកសិកម្មបានសម្របសម្រួលជាមួយរោងម៉ាស៊ីនកិនស្រូវដែលអាចផ្តល់តម្លៃសមរម្យ ។  សរុបជារួមឃើញថាទិន្នផលទទួលបានជាមធ្យមសម្រាប់ស្រូវអូអឹម ៦តោន/ហិកតា ហើយតម្លៃស្រូវក្នុងស្រុកទាំង៤ មានការប្រែប្រួល ហើយកសិករលក់បាន ៧៥០-៧៧០រៀល/គក្រ ដែលធ្វើឲ្យកសិករព្រួយបារម្ភពីការបន្តធ្លាក់ចុះទៀត ក្នុងតម្លៃនេះកសិករទទួលបានផលចំណេញទាប ។

ជាអនុសាសន៍ ឯកឧត្តមគណៈប្រតិភូបានលើកទឹកចិត្តឲ្យប្រជាពលរដ្ឋ ១) ធ្វើការជជែក សួរនាំ រាយការណ៍មកអាជ្ញាធរដែនដី មន្រ្តីកសិកម្មឃុំ មន្រ្តីកសិកម្មស្រុក មន្ត្រីជំនាញ និងមន្ទីរកសិកម្មដើម្បីជួយសម្របសម្រួលពេលជួបប្រទះបញ្ហា ជាជាងការធ្វើសកម្មភាពនានាដែលនាំឲ្យមានការបាតុភាពនានា ។ ២) មន្ទីរកសិកម្មត្រូវរៀបចំស្រែបង្ហាញ និងពិសោធន៍ប្រៀបធៀបស្រូវសែនក្រអូប និងពូជអូអឹម ដើម្បីធ្វើការបង្ហាញដល់កសិករ ក្នុងឃុំព្រៃស្វាយ ឃុំធិបតី និងឃុំព្រែកជីក ។ ៣) និងបណ្តុះបណ្តាលពីការគ្រប់គ្រងកត្តាចង្រៃ ជម្ងឺ និងសត្វល្អិតលើស្រូវ។ ៤) ពិនិត្យមើលលទ្ធភាពនៃការបង្កើតសហគមន៍កសិកម្មទំនើប ដែលអាចឲ្យកសិករបានទទួលផលប្រយោជន៍ច្រើន ។