ក្រុមការងារនៃមន្ទីរកសិកម្ម រុក្ខាប្រមាញ់ និងនេសាទ ដឹកនាំដោយលោក ឈឹម វជិរា ប្រធានមន្ទីរកសិកម្ម រុក្ខាប្រមាញ់ និងនេសាទ និងសហការីបានអមដំណើរ ឯកឧត្តម ចាន់ សុវុឌ្ឍ រដ្ឋលេខាធិការ នៃក្រសួងកសិកម្មរុក្ខាប្រមាញ់និងនេសាទ ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង និងមានការចូលរួមពីអភិបាល អភិបាលរងស្រុកបាណន់ មេឃុំបាយដំរាំ មេភូមិ កងកម្លាំង បណ្តាអង្គភាពពាក់ព័ន្ធនានា និងកសិករចំនួន ១០៣នាក់ បានចុះពិនិត្យ និងត្រៀមលក្ខណៈទប់ស្កាត់ការធ្លាក់ចុះតម្លៃស្រូវ និងពិនិត្យមើលស្ថានភាពស្រូវ ដែលត្រូវប្រមូលផលនៅចុងខែមករា និងដើមខែកុម្ភះ ។ ទីតាំងចុះពិនិត្យស្ថិតក្នុងភូមិស្តៅ មានផ្ទៃដីដាំដុះស្រូវចំនួន ២៥៨ហិកតា និងភូមិតាស៊ង មានផ្ទៃដីដាំដុះស្រូវចំនួន៣១៨ហិកតា ដែលស្ថិតនៅក្នុងឃុំបាយដំរាំ នៃស្រុកបាណន់ ដែលមានចំនួនប្រជាជនសរុបចំនួន ២,៥២០គ្រួសារ និងមានផ្ទៃដីដាំដុះស្រូវប្រភេទអូអឹមសរុបចំនួន ៣ ៩០០ហិកតា ដែលបានផលជាមធ្យម ៥,៥តោន/ហិកតា បរិមាណផលសរុបចំនួន ២១៤,០៥០តោន ដែលការប្រមូលផលបានត្រឹមតែ៥%នៅឡើយទេ រីឯទីផ្សារបច្ចុប្បន្នលក់បានតម្លៃ៧៥០រៀលក្នុង១គក្រដែលតម្លៃនេះកសិករអាចទទួលយកបាន។ ទន្ទឹមនិងនោះដែរ កសិករបានស្នើសុំ បើកទឹកបន្ថែមដើម្បីស្រោចស្រព ហើយរដ្ឋបាលខេត្ត ស្រុក និងឃុំបានដោះស្រាយរួចរាល់ហើយ ។

គណៈប្រតិភូរបានពន្យល់កសិករអំពីទីផ្សារស្រូវអូអឹម ដែលជាពូជបរទេស ហើយឲ្យកសិករងាកមកប្រើប្រាស់ពូជក្នុងស្រូវក្នុងស្រុកដូចជាសែនក្រអូប ចំប៉ីស៧០ និងផ្ការំដួល ជំនួសវិញ ។ បច្ចុប្បន្នរដ្ឋបាលខេត្តស្រុក និងអាជ្ញាធរមូលដ្ឋានបានខិតខំ ជួសជុល និងលើកផែនការស្តារ និងសាងសង់ប្រព័ន្ធស្រោចស្រពផងដែរ ។ ហើយនៅរាល់ពេលមានបញ្ហាតម្លៃស្រូវធ្លាក់ចុះក៏បានជួបប្រជុំ និងដោះស្រាយជាមួយខាងរោងម៉ាស៊ីនកិនស្រូវ ។ សរុបជារួម តម្លៃស្រូវមានការប្រែប្រួល ហើយកសិករលក់បាន ៧៥០រៀល/គក្រ តែកសិករនៅបានផលចំណេញតែបានតិចជាងមុន ។

ជាអនុសាសន៍ ឯកឧត្តមគណៈប្រតិភូបានលើកទឹកចិត្តឲ្យប្រជាពលរដ្ឋធ្វើការជជែក សួរនាំ និងរាល់ពេលមានបញ្ហាត្រូវទាក់ទងមកអាជ្ញាធរដែនដី មន្រ្តីកសិកម្មឃុំ មន្រ្តីកសិកម្មស្រុក មន្ត្រីជំនាញផ្សេងៗដើម្បីជួយសម្របសម្រួលពេលជួបប្រទះបញ្ហា និងបញ្ជូនទៅមន្ទីរកសិកម្មដើម្បីជួយដោះស្រាយបញ្ហា ជាជាងការធ្វើសកម្មភាពនានាដែលនាំឲ្យមានការបាតុភាពនានា ។