នៅព្រឹកថ្ងៃព្រហស្បតិ៍ ០២កើត ខែពិសាខ ឆ្នាំជូត ទោស័ក ព.ស២៥៦៣ត្រូវនឹងថ្ងៃទី២៣ ខែ   មេសា  ឆ្នាំ២០២០ លោក ខាត់ បូរិន ប្រធានការិយាល័យក្សេត្រសាស្រ្ត និងផលិតភាពកសិកម្ម បានដឹកនាំមន្ត្រីក្រោមឱវាទ  នៃមន្ទីរកសិកម្ម រុក្ខាប្រមាញ់  និងនេសាទខេត្តបាត់ដំបង បានចុះជួបជាមួយកសិករនៅឃុំជ្រៃ ស្រុកថ្មគោល ខេត្ត    បាត់ដំបង ដើម្បីពិនិត្យមើលស្ថានភាពការបង្កបង្កើនផលកសិកម្ម និងជម្រុញឲ្យកសិកររៀបចំ និងចាប់ផ្តើមធ្វើការដាំដុះក្នុងដំណាក់កាលពិភពលោក ក៏ដូចព្រះរាជាណាចក្រកម្ពុជា ជួបប្រទះការឆ្លងរាលដាលជម្ងឺកូវីដ-១៩។ ទន្ទឹមនឹងនោះ លោកបានជួបជាមួយលោកស្រី ជឹម វ៉ាន់ថេន ជាកសិករ (ទូរស័ព្វលេខ ០៨៨៨៦៥៥០៩៣) នៅភូមិពពាលខែ ឃុំជ្រៃ ស្រុកថ្មគោល ខេត្តបាត់ដំបង ដោយបានពិនិត្យមើលទីតាំង និងរៀបចំឲ្យកសិកររូបនេះឲ្យក្លាយទៅជាកសិករដែលធ្វើកសិកម្មតាមគោលការណ៍ការអនុវត្តន៍កសិកម្មល្អ (GAP) ក្នុងនោះរួមមានៈ

            ១)-រៀបចំសាងសង់ឃ្លាំងទុកដាក់សម្ភារៈកសិកម្ម (ជី ថ្នាំកសិកម្ម ធុងបាញ់ថ្នាំ...)ទំហំ ៣ម x ២ម មានធ្នើរពីរជាន់ដាក់សម្ភារៈ

            ២)-រៀបចំតម្លើងរោងបណ្តុះកូនឈើ/បន្លែ មានទំហំ ២ម x ៣ម (មានធ្នើរ២ជាន់)

            ៣)- រៀបចំធ្វើរោងជីកំប៉ុស្តិ៍ទំហំ       ៣ម x ៤ម

            ៤)- រៀបចំសាងសង់រោងលាង និងខ្ចប់វេចបន្លែទំហំ ៣ម x ៤ម

            ៥)- រៀបចំកែសម្រួលបរិវេណចំការឲ្យត្រូវតាមគោលការណ៍ការអនុវត្តន៍កសិកម្មល្អ (GAP) ។

ក្រោយពីបានពិភាក្សារួចមក កសិកររូបនេះសប្បាយចិត្ត និងគាំទ្រ ទទួលយកសកម្មភាពទាំងប៉ុន្មានខាងលើ ដោយសន្យានឹងដាំបន្លែបចម្រុះ និងណែនាំដល់កសិករដ៏ទៃទៀត ជាពិសេស កសិករនៅក្នុងក្រុមបណ្តុំផលិតកម្មបន្លែជាមួយគ្នា ឲ្យងាកមកធ្វើកសិកម្មតាមគោលការណ៍ការអនុវត្តន៍កសិកម្មល្អ (GAP)។