ថ្ងៃចន្ទ ១៣រោច ខែចេត្រ ឆ្នាំជូត ទោស័ក ព.ស២៥៦៣ត្រូវនឹងថ្ងៃទី២០ ខែមេសា  ឆ្នាំ២០២០ លោក ឈឹម វជិរា ប្រធានមន្ទីរ ​និងមន្រ្តីបច្ចេកទេសនៃមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង បានចុះជួប និងផ្តល់បច្ចេកទេសដល់កសិករ ប្រាក់ ហ៊ាប ភេទប្រុស រស់នៅភូមិចំការអូរ ឃុំកន្ទឺ២ ស្រុកបាណន់ ខេត្តបាត់ដំបង។ គាត់បានទទួលការគាំទ្រ សម្ភារៈរួមមានពូជមាន់ និងទូរភា្ញស់កូនមាន់ទំហំ៣៥០ពង និងបច្ចេកទេសពីកម្មវិធីASPIRE នៃមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង តាំងពីឆ្នាំ២០១៨ រហូតដល់បច្ចុប្បន្ននេះ។ លោកប្រធានបានសួរនាំគាត់ពីភាពរីកចំរើន នៃការចិញ្ចឹមមាន់យក សាច់និងភ្ញាស់កូនមាន់របស់គាត់៖

            ១. ការចំណាយលើចិញ្ចឹមមាន់ និងភ្ញាស់កូនមាន់ សរុប ៤ ៤២០ ០០០៛ ក្នុងនោះមានចំណាយដូចជាៈ

                        -ចំណាយលើការទិញចំណី(កន្ទក់ ពោត ចំណីសម្រេច...) អស់ចំនួន៧០០ ០០០៛

                        -ចំណាយថ្លៃភ្លើងអស់ចំនួន ៣៦០ ០០០៛

                        -ចំណាយលើការទិញពងមាន់ ៣ ៣៦០ ០០០៛

            ២.ចំណូលពីការលក់មាន់ ៣៤ ០០០ ០០០៛ (លក់កូនមាន់អាយុ២១ថ្ងៃ និងលក់មាន់សាច់)

            ៣.ផលចំណេញពីការលក់មាន់ យកសាច់ និងកូនមាន់ ២៩ ៥៨០ ០០០៛/ឆ្នាំ។ ក្រៅពីការចិញ្ចឹមសត្វ គាត់បានរកចំណូលពីការលក់កូនស្វាយកែវរមៀតបានចំណូលចំនួន ១០ ០០០ ០០០៛/ឆ្នាំ។ សមិទ្ធផលទំាងនេះ មន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង បានយកចិត្តទុកដាក់ធ្វើផលិតកម្មកសិកម្មដើម្បីរួមចំណែកជាមួយរាជរដ្ឋាភិបាលកម្ពុជាក្នុងការកាត់បន្ថយភាពក្រីក្រ។